Skilmálar þessir gilda í samningssambandi SaltPay IIB hf. (“SaltPay” eða “Færsluhirðir”) og seljanda (”Seljandi”) vöru og/eða þjónustu sem gert hefur samning við SaltPay um færsluhirðingarþjónustu vegna færslna seljanda á tiltekin greiðslukort. 

SaltPay er fjármálafyrirtæki skráð á Íslandi með kennitölu 440686-1259. SaltPay er með starfsleyfi frá og undir eftirliti Fjármálaeftirlits Seðlabanka Íslands. Finna má skrá yfir íslensk fjármálafyrirtæki á heimasíðu Fjármálaeftirlitsins www.fme.is. SaltPay er til húsa að Ármúla 30, 108 Reykjavík. 

SaltPay hefur, samkvæmt samningum við kortafélögin, leyfi til að færsluhirða og vinna færslur til heimildargjafar, fjárhagsfærslna og uppgjörs. 

Skilmálar þessir (eins og þeir eru á hverjum tíma) ásamt umsókn um seljandasamning og viðhengjum við hann, vinnslusamningi, verðskrá, öryggistilmælum eða ráðstöfunum, og/eða leiðbeiningum eða hverjum öðrum skjölum sem tilgreind eru á hverjum tíma sem hluti seljandasamnings, mynda “Seljandasamning” aðila.

Allar tilvísanir seljandasamnings í skilmála eru tilvísanir í skilmála þessa sem og til umsóknar um seljandasamning og viðhengja við hann, vinnslusamning, verðskrá og önnur þau skjöl sem á hverjum tíma eru skilgreind sem hluti seljandasamnings. SaltPay áskilur sér rétt á hverjum tíma til breytinga á skilmálum þessum eins og nánar er tilgreint í kafla IX breytingar. 

Samkvæmt og í samræmi við skilmála seljandasamningsins er seljanda heimilt að bjóða viðskiptavinum sínum að greiða fyrir vöru og/eða þjónustu með kortum gefnum út undir merkjum kortafélaganna. Skilmálar þessir kveða á um þau skilyrði sem uppfyllt þurfa að vera vegna móttöku korta og innsendingar færslna í kerfi SaltPay til heimildagjafar, fjárhagsfærslna og uppgjörs. 

Seljandasamningur tekur gildi þegar: (a) seljandi hefur sent inn umsókn um seljandasamning og SaltPay hefur samkvæmt umsókn gefið út seljandanúmer; eða (b) þegar seljandasamningur hefur verið undirritaður af báðum aðilum; eða (c) þegar seljandi hefur sent færslur til SaltPay til færsluhirðingar. Með því að gangast í samningssamband við SaltPay og/eða senda inn færslur vegna móttekinna korta telst seljandi hafa samþykkt skilmála þessa sem og önnur skilyrði seljandasamnings. 

Skilmálar þessir taka gildi þann 4. júní 2021 og fella úr gildi fyrri skilmála.

1.1. Allar tilvísinar í seljandasamningi til laga, reglugerða eða reglna, þar með talið reglna kortafélaganna, teljast til gildandi laga, reglugerða og reglna eins og þau eru á hverjum tíma með breytingum, viðbótum eða uppfærslum. 

1.2. Tilvísun í skilmála þessa, umsókn um seljandasamning, seljandasamning eða annað eyðublað eða skjal sem vísað er til í seljandasamningi skal teljast tilvísun í viðkomandi samning eða skjal eins og það er á hverjum tíma þ.e. með öllum samþykktum breytingum og viðaukum.

1.3. Stangist einhver ákvæða skilmála þessara á við texta ákvæðis í seljandasamningi þá skal ákvæði skilmála víkja.

1.4. Stangist ákvæði seljandasamningsins á við reglur kortafélaganna þá skal ákvæði seljandasamnings víkja. 

1.5. Fyrirsagnir í seljandasamningi og tengdum skjölum eru settar til þæginda fyrir lesanda og skulu ekki hafa áhrif á túlkun viðkomandi skjala.

1.6. Þau hugtök sem skilgreind eru í skilmálum þessum skulu hafa sömu merkingu í öðrum tengdum skjölum s.s. umsókn, samningi og/eða reglum kortafélaganna. 

1.7. Að öllu jöfnu skulu eintölu orð einnig ná til fleirtölu og öfugt. 

1.8. Aðili telst samkvæmt samningi þessum vera einstaklingur, fyrirtæki eða eining í annars konar félagaformi (óháð því hvort viðkomandi teljist sérstök lögpersóna eða ekki).

1.9. Ef annað er ekki sérstaklega tekið fram þá skal tilvísun til aðila einnig ná til eftirmanna, framsals- og afsalshafa þeirra.

1.10. Þegar kveðið er á um bann seljanda við að aðhafast eitthvað þá innifelur slíkt bann einnig í sér skyldu seljanda til að setja bann við slíkri athöfn í starfsemi sinni.

1.11. Orð sem fylgja orðasamböndunum “þar með talið” og “til dæmis” eða öðrum sambærilegum orðasamböndum eru sett fram til frekari skýringar og skulu aldrei hafa áhrif til þrengri túlkunar texta sem þau tengjast.

2.1 Í seljandasamningi þessum, þar sem samhengi texta leyfir, skulu eftirfarandi hugtök skilgreind með þeim hætti sem hér segir: 

Aðili að kortafélögunum: Aðili sem starfar undir leyfi eins eða fleiri kortafélaga.

CVM (Cardholder Verification Method) mörk: Fjárhæðarmörk sem kortafélögin setja vegna tiltekinna tegunda færslna.

Endurgreiðsla: Færsla sem gerð er til leiðréttingar fyrri greiðslu þ.e. endurgreiðsla upphaflegrar úttektar, s.s. þegar korthafi skilar vöru eða afpantar fyrirfram greidda vöru eða þjónustu eða af einhverjum öðrum ástæðum á rétt á endurgreiðslu t.d. vegna þess að seljandi hefur ekki afhent vöru eða þjónustu að hluta eða öllu.

Endurkrafa: Aðgerð sem skilgreind er í reglum kortafélaganna þar sem kortaútgefandi getur endurkrafið SaltPay um fjárhæð úttektar í heild eða að hluta og SaltPay getur með sama hætti krafið seljanda um sömu fjárhæð.

Endurkröfugjald: Gjald sem SaltPay innheimtir af seljanda vegna hverrar endurkröfu sem gerð er á færslu.

Frádráttur vegna veltutryggingar: Tilgreint hlutfall (prósenta) af heildarfjárhæð allra færslna án tilskilins frádráttar svo sem vegna þóknunar SaltPay og endurkrafna.  

Færsla: Aðgerð framkvæmd af korthafa og seljanda sem leiðir til tilfærslu fjár af eða á reikning korthafa. Færsla telst einungis vera ”gild” þegar öll neðangreind skilyrði eru uppfyllt:

- færsla er greiðsla fyrir vöru og/eða þjónustu sem veitt er af seljanda sjálfum frá starfsstöð seljanda; 

- vara/þjónusta er samkvæmt þeim upplýsingum sem seljandi gaf um starfsemi sína á umsókn um seljandasamning; 

- færslan sem og aðferð við að veita vöru/þjónustu eru í samræmi við lög, reglugerðir og reglur; 

- færslan sem og aðferð við að veita vöru/þjónustu eru í samræmi við reglur kortafélaganna; og 

- seljandi uppfyllir öll skilyrði seljandasamnings um færslur og vörur/þjónustu sem heimilt er að veita. 

Færsla án korts: Færsla á kort þar sem korti er ekki framvísað. Til þess að taka af allan vafa þá falla hér undir allar úttektir sem myndu teljast fjarsala þ.m.t. símsala, netfærslur og greiðslur gerðar í gegnum fjarskipti s.s. með veglyklum.

Færsla með korti: Færsla þar sem korti er framvísað af korthafa á mannaðri afgreiðslustöð á þeim tíma sem færslan er gerð, færslur í hraðbanka, færslur sem framkvæmdar eru á posa með snjallsíma og færslur í sjálfsafgreiðslutækjum. 

Færslufjárhæð: Heildarfjárhæð færslu eins og hún er tilgreind í uppgjöri seljanda í tilgreindri uppgjörsmynt. 

Færslugjald: Fast gjald, sem leggst á hverja heimilaða/uppgerða færslu og fast gjald sem leggst á hverja hafnaða/ógilda færslu, eins og það er skilgreint í verðskrá SaltPay. 

Færslukvittun: Rafræn eða pappírs staðfesting færslu, útbúin við sölu, sönnun kaupa eða endurgreiðslu. 

Verðskrá: Gildandi verðskrá SaltPay, vegna þjónustu á því svæði sem seljandi starfar. Í verðskrá eru tilgreindar fjárhæðir og/eða gjöld sem greiðast skulu af seljanda og ekki eru þegar tilgreind í seljandasamningi aðila. Verðskrá SaltPay er aðgengileg seljanda á heimasíðu SaltPay. Sé ekki í gildi verðskrá fyrir það svæði sem seljandi starfar á skulu gjöld vera sérstaklega umsamin í samningi aðila. 

Gjöld: Öll gjöld sem seljanda ber að greiða SaltPay fyrir þjónustu samkvæmt seljandasamningi, s.s. þjónustuþóknun, endurkröfugjald, færslugjald, millikortagjald, gjöld kortafélaganna og uppgjörsgjald. 

Gjöld kortafélaganna: Gjöld á kortafærslur, ákveðin af kortafélögunum. 

Kort: Gilt greiðslukort útgefið undir leyfum kortafélaganna eða útgáfa þess hefur með öðrum hætti hlotið samþykki kortafélaganna.

Kortafélögin: Visa Inc., MasterCard Worldwide, Unionpay International og önnur þau alþjóðleg eða svæðisbundin kortafélög sem SaltPay hefur á hverjum tíma heimild frá til að bjóða færsluhirðingarþjónustu. Sérstaklega er skilgreint í umsókn og/eða seljandasamningi kortum hvaða kortafélaga seljanda er heimilt að móttaka samkvæmt samningi.

Kortamerki: Einkaréttarlega varin samsetning nafns, merkis og litar sem notað er sem sjónrænt kennimark viðkomandi kortafélags.

Kortaútgefandi: Aðili sem starfar samkvæmt leyfum kortafélaganna og gefur út kort til korthafa í samræmi við reglur þeirra. 

Korthafi: Einstaklingur sá er kort er gefið út til og hefur heimild til að nota útgefið kort. 

Kortnúmer: Kortnúmer eða kortareikningsnúmer (e. Primarty Account Number eða PAN) er einkvæm númeraröð sem notuð er til að auðkenna kortareikning korthafa. 

Kvittun vegna endurgreiðslu: Staðfesting seljanda, rafræn eða á pappír, á endurgreiðslu. 

Markaðsnafn: Það nafn sem seljandi notar til kynningar og í viðskiptum á markaði (þegar ekki er notað skráð lögheiti). 

MCC (Merchant Category Code): Fjögurra stafa talnaröð (kóði) sem notuð er til að auðkenna tegund viðskipta sem seljandi stundar. MCC kóðar eru settir af alþjóðlega staðlaráðinu (e. International Organization for Standardization).

Merki SaltPay: Nafn SaltPay, merki, vörumerki (skráð eða óskráð) sem og önnur orð, merki eða litir sem notuð eru til að einkenna SaltPay. 

Millikortagjald: Gjald, greitt af SaltPay með beinum eða óbeinum hætti (þ.e. í gegnum þriðja aðila) til kortaútgefanda fyrir hverja færslu og endurheimtir SaltPay gjaldið af seljanda. 

Myntval (DCC – Dynamic Currency conversion): Færsla með eða án korts þar sem korthafi getur valið hvort hann greiði fyrir vöru/þjónustu í eigin gjaldmiðli (gjaldmiðli þess lands sem kort er gefið út í) eða staðbundins gjaldmiðils seljanda. 

Neikvæð staða seljanda: Þegar samanlögð fjárhæð endurgreiðslna, endurkrafna, þóknana eða annarra krafna SaltPay á hendur seljanda er hærri en sem nemur uppsafnaðri veltu seljanda á sama tíma þannig að á samningi myndist skuld gagnvart SaltPay. 

Númer seljandasamnings: Einkvæmt númer sem notað er til að auðkenna seljanda, einstaka afgreiðslutæki hans eða útibú. Nota má sama seljandanúmerið á fleiri en einni starfsstöð hafi slíkt verið sérstaklega samþykkt í seljandasamningi.

Ólögmæt færsla: Færsla eða tilraun til óréttmætrar færslu. Einkum er vísað til: 

- færsla fyrir vöru og/eða þjónustu sem veitt er af öðrum en seljanda sjálfum eða þegar færsla er gerð í þeim tilgangi að greiða öðrum en seljanda sjálfum; 

- færsla fyrir vöru/þjónustu sem veitt er frá öðrum stað en starfsstöð seljanda; 

- færsla fyrir vöru/eða þjónustu annarrar tegundar eða eðlis en tilgreint var í umsókn seljanda; 

- færsla sem er ekki réttmæt eða sem seljandi veit eða mátti vita að sé sviksamleg eða hafi ekki verið heimiluð af korthafa; 

- færsla vegna vöru/þjónustu sem brýtur í bága við lög eða reglur; 

- færsla vegna vöru/þjónustu sem brýtur í bága við reglur kortafélaganna; 

- færsla vegna vöru/þjónustu sem með einhverjum hætti samræmist ekki skilmálum seljandasamnings; eða

- færsla sem gerð er í þeim tilgangi að komast fram hjá ofangreindum ákvæðum.

PCI/DSS staðall: Staðall (e. The payment Card Industry (PCI) Data Security Standard (DSS)) er alþjóðlegur upplýsingaöryggisstaðall settur af Payment Card Industry Security Standards ráðinu (PCI SSC) og er birtur á vefsíðunni: http://www.pcisecuritystandards.org/.

QPS: Mastercard Quick Payment Service, þjónusta um flýtigreiðslur eins og hún er skilgreind af Mastercard. 

Reglur kortafélaganna: Reglur og staðlar kortafélaganna, sem ná til þátta er tengjast greiðslukortum og kortamerkjum birtar aðilum að kortafélögunum. Reglur kortafélaganna eru aðgengilegar á vefsvæðum kortafélaganna. Það er hlutverk hvers og eins kortafélags að túlka og framfylgja eigin reglum. 

Snertilaus færsla: Færsla gerð með því að korthafi ber kort eða annað tæki sem búið er rafeindabúnaði (near field communication NTC) að afgreiðslutæki. 

Starfsemi umfram viðmiðunarmörk: Þegar hlutfall endurkrafna er yfir 1% af fjárhæð heildarveltu seljanda í mánuði og/eða þegar hlutfall sviksamlegra færslna er yfir 1% af fjárhæð heildarveltu í mánuði. 

Starfsstöð seljanda: Staðsetning starfsstöðvar seljanda eins og hún er tilgreind í umsókn um seljandasamning, seljandasamning og/eða í kerfum SaltPay. 

Umboðsaðili (e.Independant Sales Organization ISO): Þjónustuaðili, skráður hjá kortafélögunum, sem veitir tiltekna þjónustu s.s. sölu færsluhirðingarþjónustu, þjónustu við korthafa/seljendur, fræðslu og þjálfun seljenda og dreifingu afgreiðslutækja. 

Umsókn um seljandasamning: Rafræn umsókn á vef SaltPay þar sem seljandi sækir um þjónustu SaltPay og veitir tilskildar upplýsingar. 

Uppgjörsdagur: Dagurinn þegar uppgjörsfjárhæð er gerð upp við seljanda í samræmi við ákvæði seljandasamnings. Uppgjörstíðni þ.e. tími frá því færsla er send inn þar til hún er greidd skal vera skilgreind í umsókn seljanda um seljandasamning eða í öðrum skriflegum samningi aðila þar um. 

Uppgjörsfjárhæð: Fjárhæð í uppgjörsmynt. Andvirði allra gildra færslna á uppgjörstímabili að frádregnum umsömdum gjöldum, kostnaði eða öðrum kröfum sem SaltPay er heimilt að draga frá andvirði innsendra færslna hvort sem er samkvæmt ákvæðum seljandasamnings eða lögum. 

Uppgjörsmynt: Gjaldmiðill sem færslur til seljanda eru gerðar upp í. Uppgjörsmynt skal vera tilgreind í umsókn um seljandasamning eða í seljandasamningi aðila. 

Veltutrygging: Veltutryggingarsjóður sem stofnast með þeim hætti að fé er haldið eftir af uppgjörum seljanda í samræmi við seljandasamning. 

Vinnslusamningur: Samningur SaltPay og seljanda þar sem skilgreind eru skilyrði vinnslu persónuupplýsinga korthafa og/eða persónuupplýsinga tengdum færslum. 

Virkir dagar: Virkir dagar eru þeir dagar þegar bankar eða aðrar fjármálastofnanir í Reykjavík eru almennt opnar fyrir viðskiptum í tilgreindri uppgjörsmynt og bankar eru opnir í heimalandi/-borg seljandafyrir viðskipti í uppgjörsmynt.

Þjónustuaðili (e.Third Party Processor (TPP)): Þjónustuveitandi sem samið hefur við seljanda um vinnslu/vísun færslna eða aðra tækniþjónustu. Aðili sem þjónar seljanda vegna afgreiðslutækja, vísun heimildabeiðna, söfnun upplýsinga á rafrænu formi, skráavinnslu og/eða aðra vinnslu korthafa- eða færsluupplýsinga telst vera þjónustuaðili.

Þjónustuvefur: Vefaðgangur fyrir seljendur í færsluhirðingarþjónustu hjá SaltPay, þar sem seljandi getur skoðað færslur og uppgjör, auk þess sem hann getur móttekið tilkynningar og átt samskipti við SaltPay með öruggum hætti. 

Þjónustuveitandi (e. Service Provider): Stofnun eða lögaðili sem veitir aðilum að kortafélögunum einum eða fleiri, skilgreinda þjónustu. Þjónustuveitandi verður að vera skráður hjá kortafélögunum og er einungis heimilt að veita þá þjónustu sem tilgreind hefur verið við skráningu. 

Þjónustuþóknun: Gjöld seljanda til SaltPay fyrir þá þjónustu sem veitt er samkvæmt seljandasamningi þ.m.t. seljandaþóknun. 

Örgjörvafærsla: Færsla þar sem korthafi stingur örgjörvakorti í afgreiðslutæki sem búið er örgjörvalesara. 

Öryggisatvik (e. Account Data Compromise Event): Atvik sem opnar, beint eða óbeint, fyrir óheimilan aðgang að kortakerfum og/eða kortagögnum. 

Öryggisnúmer (e. Card Security Code): Öryggisnúmer sem finna má á bakhlið korts (CVC2/CVV2/CVD/CID/CAV2) og er notað til þess að framkvæma greiðslu þar sem kort er ekki á staðnum. 

3D Secure: Öryggisbúnaður kortafélaganna s.s. “MasterCard SecureCode” og “Verified by Visa” notaður til þess að koma í veg fyrir sviksamlegar kortafærslur á netinu. 

3.1. Að því gefnu að farið sé að skilyrðum seljandasamnings, er seljanda heimilt að taka við kortum þeirra tegunda sem tilgreindar voru í umsókn hans um seljandasamning. SaltPay mun hirða færslur seljanda, annast heimildagjöf, fjárhagsfærslur og uppgjör gildra færslna. SaltPay ber ekki skylda til að annast færsluhirðingarþjónustu vegna færslna sem ekki eru réttmætar. Ef SaltPay hefur sett færsluhirðingu seljanda sérstök skilyrði þá skulu slík skilyrði teljast hluti seljandasamnings. 

3.2. Það er á ábyrgð seljanda að taka í notkun og viðhalda á eigin kostnað sölu- og afgreiðslukerfi eða afgreiðslutæki (Posa) sem gera honum kleift að móttaka greiðslur með kortum í samræmi við skilmála seljandasamnings.

3.3. Seljanda er óheimilt að heimila eða senda inn færslur þar sem úttekt er gerð án korts nema slíkt hafi sérstaklega verið heimilað í seljandasamningi. 

3.4. Starfsemi seljanda má ekki brjóta í bága við lög, reglugerðir eða reglur kortafélaganna. Seljandi má ekki gefa það í skyn að hann sé aðili að kortafélögunum. 

3.5. Seljanda er, undantekningarlaust, óheimilt að taka á móti korti sem greiðslu fyrir eitthvað af eftirtöldu: 

(a) greiðslu fyrir vöru og/eða þjónustu sem veitt er af öðrum en seljanda sjálfum, eða þar sem færsla er gerð í þeim tilgangi að koma greiðslu til aðila annars en seljanda sjálfs; 

(b) greiðslu fyrir vöru og/eða þjónustu sem veitt er frá öðrum stað en starfsstöð seljanda; 

(c) greiðslu fyrir vöru og/eða þjónustu aðra en þá sem tilgreind var í umsókn seljanda um seljandasamning; 

(d) færslu sem ekki er samþykkt af korthafa; 

(e) sviksamlegum eða óréttmætum færslum; 

(f) færslu sem áður hefur verið mótmælt, eldri kortafærslu, kröfu um greiðslu ógilds tékka og eða til að innheimta kröfu sem seljandi hafði áður talið ómögulegt að innheimta; 

(g) greiðslu vegna vöru og/eða þjónustu sem brýtur í bága við lög eða reglur í heimalandi seljanda og/eða korthafa; 

(h) greiðslu vegna vöru og/eða þjónustu sem brýtur í bága við reglur kortafélaganna; 

(i) greiðslu fyrir vöru og/eða þjónustu sem er til þess fallin að skaða viðskiptavild kortafélaganna, SaltPay, greiðslukerfi kortafélaganna og/eða draga úr virði merkja kortafélaganna og/eða SaltPay; eða 

(j) greiðslu fyrir vöru og/eða þjónustu sem á einhvern hátt brýtur í bága við ákvæði seljandasamnings eða eru framkvæmdar með það að sjónarmiði að fara í kringum ákvæði seljandasamnings.

3.6. Seljandi má ekki gera það að skilyrði fyrir móttöku korts sem greiðslu að korthafi afsali sér rétti sínum til að mótmæla færslu. 

3.7. Seljandi má búa afgreiðslutæki sín þannig að við móttöku korta sem bera fleiri en eitt merki (e. co-branded) velji tækið tiltekin merki framar öðrum. Seljanda er þó ávallt óheimilt að meina korthafa að breyta vali afgreiðslutækis á því undir hvaða merki færsla skuli gerð. 

3.8. Seljanda er óheimilt að gera kröfu um lágmarksfjárhæð færslu.

3.9. Seljanda er skylt að birta endanlegt verð vöru og/eða þjónustu (nema í þeim tilvikum sem hann veitir staðgreiðsluafslátt) og honum er óheimilt að bæta kostnaði eða gjöldum við þegar birt verð þegar korthafi ákveður að greiða með korti, nema slíkt sé heimilt samkvæmt lögum Evrópska efnahagssvæðisins eða lögum í heimalandi seljanda. 

3.10. Seljandi má hvorki beint né óbeint krefjast þess að korthafi inni af hendi viðbótargreiðslu þegar greitt er með korti, nema slíkt sé heimilt samkvæmt lögum Evrópska efnahagssvæðisins eða lögum í heimalandi seljanda.

3.11. Seljandi skal tryggja að markaðsnafn hans sé tilgreint í tengslum við þjónustu hans og að nafnið sé sýnilegt á öllum stigum viðskiptanna við korthafa. Seljandi skal tryggja að korthafi geti treyst ábyrgð seljanda í viðskiptunum, þar með talið á afhendingu vöru og þjónustu sem greitt var fyrir, almennri þjónustu tengdri viðskiptunum og úrlausn ágreiningsmála. 

3.12. Seljandi má ekki endurgreiða kortafærslu með reiðufé nema í gegnum sérstaka þjónustuleið kortafélaganna sem seljandi þarf þá að vera skráður í sem og að uppfylla þátttökuskilyrði. Seljanda er þó heimilt að greiða reiðufé sé starfsemi hans fólgin í innlausn ferðatékka, móttöku sérstakra ferðakorta sem útgefin eru af kortafélögunum eða vegna sérstakrar þjónustu um miðlun gjaldmiðla að því gefnu að SaltPay hafi gefið samþykki sitt fyrir því að hirða færslur hans í tengslum við slík viðskipti. Þegar slíkt á við takmarkast fjárhæð færslu ætíð við fjárhæð ferðatékka, ferðakorts eða fjárhæðar í erlendri mynt að viðbættri þóknun seljanda. Undir engum kringumstæðum er seljanda heimilt að greiða korthafa í ferðatékkum þegar ætlun var að greitt yrði fyrir vöru og/eða þjónustu með reiðufé. 

3.13. Það er á ábyrgð seljanda að starfsmenn hans fari í hvívetna að ákvæðum seljandasamnings. 

4.1. Seljandi má ekki, nema þegar lög eða reglur kortafélaganna kveða á um slíkt, neita að taka við korti á grundvelli þess hver korthafi eða útgefandi korts er. 

4.2. Seljandi má óska eftir, en ekki gera að skilyrði fyrir móttöku korts, að korthafi framvísi skilríkjum eða auðkenni sig á annan hátt, nema slíkt sé nauðsynlegt til að framkvæma megi viðskipti s.s. vegna sendingar eða þegar reglur kortafélaganna heimila eða kveða sérstaklega á um að afla skuli slíkra viðbótarupplýsinga.

4.3. Seljanda er skylt að gæta jafnræðis við móttöku korta sem gefin eru út innan Evrópska efnahagssvæðisins og lúta sömu milligjöldum. Seljandi má ekki stunda viðskiptahætti sem mismuna korthöfum eða hvetja viðskiptavini til að framvísa öðrum greiðslumiðlum en korti nema slíkt sé sérstaklega heimilað í lögum Evrópska efnahagssvæðisins eða lögum heimalands seljanda. Seljanda er þó aldrei skylt að taka á móti debetkortum kjósi hann að móttaka kreditkort og öfugt. Seljanda er ekki skylt að móttaka fyrirtækjakort sem gefin eru út á Evrópska efnahagssvæðinu. 

4.4. Seljandi skal móttaka öll gild kort sem hann hefur heimild til að móttaka og eru útgefin utan Evrópska efnahagssvæðisins undir merkjum kortafélaganna.

5.1. Seljandi má einungis framkvæma endurgreiðslu á kortareikning korthafa þegar endurgreiða á kortafærslu sem gerð var á þann sama kortareikning í tengslum við sölu á vöru eða þjónustu. 

5.2. Einungis má endurgreiða kortafærslu inn á reikning þess korts sem framvísað var í þeim viðskiptum sem verið er að endurgreiða. Endurgreiðsla skal vera í sömu mynt og upphaflega færslan og má vera að fjárhæð allt að eða jöfn upprunalegri færslu en má ekki vera hærri fjárhæðar, nema seljanda sé skylt samkvæmt lögum að bjóða uppá hærri greiðslu.

5.3. Seljandi skal greiða SaltPay fjárhæð endurgreiðslu að fullu, ásamt þeim gjöldum og þóknunum sem á hana leggjast, þegar hennar er krafist. Seljandi á ekki rétt á endurgreiðslu þeirra gjalda og þóknana sem hann greiddi vegna þeirrar færslu sem var endurgreidd korthafa. 

5.4. Seljanda er óheimilt að greiða inn á reikning korthafa í öðrum tilvikum en þegar endurgreiða á fyrri færslu, nema slíks sé krafist af SaltPay, samkvæmt reglum kortafélaganna eða slíkt sé skylt lögum samkvæmt. 

5.5. SaltPay er heimilt á hverjum tíma að loka fyrir endurgreiðslur seljanda þannig að honum verði ókleift að senda inn færslur til endurgreiðslu í gegnum SaltPay. 

6. Trúnaðarskyldur og öryggi kortaupplýsinga

6.1. Seljandi skal gæta fyllsta trúnaðar gagnvart korthafa vegna viðskipta þeirra á milli. Seljandi ber auk þess ábyrgð á að tryggja öryggi upplýsinga korthafa og kortaupplýsinga sem miðlað er í tengslum við móttöku korta. 

6.2. Seljandi skal tryggja öryggi kortaupplýsinga og við alla meðhöndlun og varðveislu þeirra skal hann gæta þess að vinnsla gagna uppfylli skilyrði PCI DSS staðals og annarra öryggisreglna kortafélaganna, óháð því hvort seljandi annast sjálfur þessa þætti eða úthýsir til þriðja aðila. SaltPay getur á hverjum tíma kallað eftir staðfestingu þess að framkvæmd hafi verið, af til þess hæfum aðila (QSA eða ISA), úttekt á hlítingu seljanda við staðalinn og/eða að seljandi hafi framkvæmt árlegt sjálfmat. Fyrir staðlaðan búnað sem seljandi kaupir eða leigir skal seljandi tryggja að búnaðurinn hafi gilda PADSS vottun. 

6.3. Seljanda er óheimilt að óska eftir eða nota upplýsingar um kortnúmer í neinum öðrum tilgangi en til að gera gildar færslur. Seljandi má aldrei fara fram á það við korthafa að hann útfylli eyðublað eða form, þar sem óskað er upplýsinga um kortnúmer, gildistíma korts, undirritun korthafa eða nokkrar aðrar upplýsingar um kortareikning eða korthafa, þar sem upplýsingar eru sýnilegar þegar slíkt eyðublað eða form væri póstlagt s.s. póstkort. Seljandi má ekki óska eftir því að korthafi veiti skriflega upplýsingar um öryggisnúmer korts. 

6.4. Seljandi má ekki undir nokkrum kringumstæðum geyma viðkvæmar kortaupplýsingar þ.m.t. upplýsingar sem finna má á rafmiðlum korts s.s. segulrönd eða örgjörva, öryggisnúmer og PIN númer. 

6.5. Seljandi skal án tafar tilkynna SaltPay um öryggisatvik eða grun um öryggisrof eða atvik. SaltPay má deila slíkum upplýsingum með kortafélögunum sem og viðeigandi yfirvöldum. Komi upp öryggisatvik þá er SaltPay og/eða kortafélögunum heimilt að krefjast þess að PCI PFI rannsóknaraðili framkvæmi óháða rannsókn í þeim tilgangi að finna og meta orsakir, umfang, stærð, tímalengd og áhrif öryggisatviks eða mögulegs öryggisatviks. Seljandi skal veita rannsóknaraðilum án tafar þá aðstoð og aðgengi sem nauðsynlegt er vegna rannsóknar. Séu niðurstöður rannsóknar birtar seljanda en ekki SaltPay og/eða kortafélögunum skal seljandi miðla niðurstöðum til þeirra. Hafi rannsókn sýnt fram á að seljandi uppfyllti ekki kröfur PCI DSS staðalsins á þeim tíma sem öryggisatvik átti sér stað og að orsakir öryggisatviks megi rekja til þessa, skal seljandi bera allan kostnað af rannsókn sem og afleiddum kostnaði s.s. sektum og/eða afleiddu tjóni.

6.6. Aðilar sem annast vinnsluþjónustu fyrir seljanda (þjónustuaðili) s.s. rekstur afgreiðslutækja, færsluvísunar vegna heimildasvörunar, söfnun rafrænna upplýsinga, skráavinnslur og/eða koma að meðhöndlun korthafa- eða færsluupplýsinga með öðrum hætti, skulu vera skráðir á viðeigandi máta hjá kortafélögunum. Seljandi skal tryggja að vinnsluaðilar hafi staðist úttekt um hlítingu við PCI DSS staðal. Seljandi skal tryggja að samningar hans við vinnsluaðila innihaldi ákvæði sambærilegt við ákvæði 6.5. í skilmálum þessum. Seljanda er óheimilt að nota vinnsluaðila án fyrirfram gefins skriflegs samþykkis SaltPay. Seljandi skal tryggja að upplýsingum um nöfn korthafa eða kortnúmer verði ekki miðlað til vinnsluaðila sem ekki uppfylla skilyrði eða hafa ekki verið samþykktir af SaltPay. 

6.7. Seljanda er óheimilt að upplýsa þriðja aðila um efni eða innihald seljandasamnings. 

6.8. Seljandi skal ætíð fylgja fyrirmælum og leiðbeiningum SaltPay um öryggisráðstafanir, á hvaða formi sem þeim er miðlað, hvort sem fyrirmæli eða ráðstafanir lúta að atriðum tengdum framkvæmd seljandasamnings eða nýtingar annarrar þjónustu SaltPay s.s. notkun þjónustuvefs. Seljanda skal jafnframt skylt að fara að kröfum SaltPay í tengslum við nauðsynlegar breytingar á kerfum seljanda sem tengjast SaltPay, svo sem vefþjónustur. Seljandi ber ábyrgð á öryggisrofum sem verða innan hans umfangs. 

6.9. Prókúruhafa seljanda er veittur aðgangur að þjónustuvef SaltPay og ber ábyrgð á aðgangi seljanda að sem og stofnun nýrra notenda eftir því sem við á. Geymsla upplýsinga

7.1. Seljandi skal geyma afrit færslukvittana, rafrænar upplýsingar sem og kvittanir vegna endurgreiðslna vegna allra færslna sem sendar hafa verið til SaltPay í fimm (5) ár frá innsendingu. 

8. Skylda til að veita SaltPay upplýsingar og aðgengi

8.1. Seljandi skal án tafar upplýsa SaltPay skriflega um: 

(a) öryggisbrot eða öryggisatvik sbr. ákvæði 6.5; 

(b) tap, stuld, misnotkun eða óheimila notkun afgreiðslubúnaðar eða annara kerfa sem notuð eru við meðhöndlum kortaupplýsinga eða grun um slíka notkun; 

(c) meiriháttar breytingar á starfsemi seljanda; 

(d) breytingar á prókúruhafa seljanda; 

(e) breytingar í hóp þeirra eigenda sem skilgreindir eru sem raunverulegir eigendur og/eða á fyrirkomulagi eignarhalds seljanda; eða 

(f) aðstæður sem eru til þess fallnar að hindra seljanda í að uppfylla skyldur sínar samkvæmt seljandasamningi.

8.2. Fari SaltPay þess á leit, skal seljandi staðfesta með skriflegum hætti hvort eitthvert af þeim atvikum sem talin eru upp í 8.1 hafi átt sér stað eða ekki. 

8.3. SaltPay getur á hverjum tíma farið fram á að fá afhent afrit af færslukvittunum seljanda og/eða, ef við á, öðrum gögnum eða upplýsingum s.s. greiðslubeiðnum, rafrænum færsluskrám og/eða kvittunum vegna endurgreiðslna. Seljandi skal veita SaltPay slíkar upplýsingar innan tuttugu (20) virkra daga frá því beiðni þar um berst honum. 

8.4. SaltPay er heimilt á hverjum tíma að framkvæma áreiðanleikakönnun á seljanda, raunverulegum eigendum, stjórnarmönnum og prókúruhöfum eftir því sem við á samkvæmt lögum um aðgerðir gegn peningaþvætti og fjármögnun hryðjuverka sem og reglur alþjóðlegu kortafélaganna. Í tengslum við áreiðanleikakönnun og reglubundið eftirlit er SaltPay heimilt hvenær sem er á samningstímanum að afla upplýsinga í gegnum kerfi eða upplýsingasöfn þriðja aðila sem SaltPay hefur aðgang að. 

8.5. Seljandi skal án tafar afhenda SaltPay þau gögn/upplýsingar sem félagið óskar eftir og eðlilegt er að sé miðlað vegna viðskiptanna, s.s. gögn nauðsynleg vegna áreiðanleikakönnunar og/eða gögn/upplýsingar um fjárhagsstöðu seljanda s.s. ársreikninga. 

8.6. Seljandi skal verða við kröfu SaltPay, kortafélaga og/eða viðeigandi yfirvalda um að veita vottunar- og/eða rannsóknaraðilum aðgang að búnaði og kerfum þeim sem notuð eru við móttöku korta. 

8.7. Seljandi skal veita SaltPay, kortafélögum og/eða viðeigandi yfirvöldum sem hafa lögsögu yfir seljanda, aðgang að starfsstöð/(vum) seljanda svo gera megi úttekt á hlítni hans við ákvæði seljandasamnings. Slíkur aðgangur skal veittur án nokkurs fyrirvara nema ef lög kveða á um að slík beiðni sé sett fram með tilteknum fresti.

9. Heimild seljanda til notkunar merkja kortafélaganna og merkja SaltPay

9.1. Seljandi samþykkir, nema samið hafi verið um annað við SaltPay og samanber ákvæði 9.2, að stilla út með áberandi hætti merkjum kortafélaganna og/eða öðru markaðsefni sem SaltPay afhendir honum. Seljanda er heimilt að nota merki og annað markaðsefni sem fengið hefur samþykki SaltPay og er ætlað til kynningar á móttöku korta hjá seljanda. Seljandi skal stilla upp merkjum sem færsluhirt eru af SaltPay á jafn áberandi hátt og merkjum annarra korta og greiðslumiðla. Seljanda er óheimilt að nota markaðsefni sem vísar til SaltPay eða kortafélaganna án samþykkis SaltPay. 

9.2. Seljanda er ekki skylt að stilla út merkjum eða öðru markaðsefni kortafélaganna ef hann er ekki að veita þjónustu til almennings eða ef slík útstilling stríðir gegn ákvæðum gildandi laga.

9.3. SaltPay ábyrgist að notkun seljanda á merkjum kortafélaganna og/eða SaltPay, í samræmi við ákvæði samnings þessa, sé seljanda heimil og að SaltPay sé eigandi merkja SaltPay og hafi heimild kortafélaganna til notkunar merkja þeirra. SaltPay ábyrgist skaðleysi seljanda af öllum kröfum sem upp kunna að koma í tengslum við notkun merkja eins og hún er heimiluð samkvæmt seljandasamningi. 

9.4. SaltPay og/eða kortafélögin geta á hverjum tíma krafist þess af seljanda að hann hætti notkun vöru- eða einkennismerkja kortafélaganna, SaltPay eða annars markaðsefnis sem hefur að geyma tilvísun til SaltPay eða einhvers kortafélaganna. Seljandi skal hætta notkun merkja um leið og honum er tilkynnt um kröfu SaltPay og/eða kortafélaganna þar um. 

9.5. Ekki er kveðið á um neitt það í seljandasamningi sem veitir seljanda tilkall til eignar eða vörumerkjaréttar á hönnun eða hugverkum í eign SaltPay eða kortafélaganna. Réttur seljanda til að nota hönnun eða hugverk í eigu SaltPay eða kortafélaganna takmarkast við það sem heimilað er í kafla 9 í skilmálum þessum. 

10.1. Seljandi skal leita heimildar fyrir öllum færslum yfir skilgreindum heimildamörkum. Heimildamörk miðast við hámarksfjárhæð einnar einstakrar færslu sem seljanda er heimilt að senda inn án þess að hafa áður leitað heimildar útgefanda fyrir úttektinni. Heimildarmörk færslu skulu vera tilgreind í umsókn um seljandasamning. Hafi heimildarmörk ekki verið skilgreind í umsókn um seljandasamning þá teljast mörkin vera núll og seljandi skal leita heimildar vegna allra færslna. Seljandi skal tryggja að réttur MCC kóði fylgi heimildarbeiðni.

10.2. SaltPay rekur heimildarkerfi sem seljandi getur tengst beint í gegnum gátt SaltPay eða með annarri tengingu sem uppfyllir skilyrði SaltPay. Seljandi getur tengst kerfi að undangenginni úttekt SaltPay á gátt. Seljandi ber ábyrgð á að búnaður sem notaður er til að tengjast kerfum SaltPay uppfylli reglur kortafélaganna og ákvæði seljandasamnings. 

10.3. Þó heimildarbeiðni sé samþykkt felur það ekki í sér staðfestingu á réttmæti færslu. Korthafi getur átt rétt á að endurkrefja seljanda um fjárhæð færslu samkvæmt reglum kortafélaganna óháð staðfestingu korthafa á færslu. Auk þess getur SaltPay hafnað færslu sem ólögmætri. Seljandi gerir sér grein fyrir að korthafi getur síðar hafnað færslum sem ekki hafa verið staðfestar með innslætti pinns, undirskrift eða notkun 3D Secure. 

10.4. SaltPay áskilur sér rétt til að takmarka eða stöðva, ef nauðsyn krefur, móttöku korta, færslur eða viðskipti í tilteknum gjaldmiðlum. Dæmi um aðstæður þar sem SaltPay myndi nýta þennan rétt sinn eru m.a.: 

(a) ef gjaldeyrishöft eða önnur sambærileg lög eða reglur banna miðlun færslu eða færsluupplýsinga yfir landamæri; 

(b) hafi SaltPay eða seljandi ástæðu til að ætla að korthafi, kort eða kortnúmer hafi eða séu líkleg til að tengjast sviksamlegu athæfi eða gáleysislegri hegðun til komast yfir vöru eða þjónustu; eða sem getur leitt til þess að ekki verði hægt að innheimta úttekt af korthafa; 

(d) þegar SaltPay er kunnugt um eða grunar að færsla sé ólögmæt; (e) þegar SaltPay er það skylt samkvæmt lögum eða reglum kortafélaganna; eða 

(f) þegar SaltPay veit eða grunar að starfsemi seljanda sé ekki í samræmi við ákvæði seljandasamnings og/eða reglur kortafélaganna. 

(g) Endurgreiðslur seljanda, sbr. ákvæði 5.5.

11.1. Afgreiðslutæki seljanda skal útbúa færslukvittun vegna hverrar færslu. Þetta á einnig við um endurgreiðslur. Afrit færslukvittunar skal afhent korthafa nema hann afþakki. 11.2. Sérhver færslukvittun skal í það minnsta innihalda eftirfarandi upplýsingar: 

(b) markaðsnafn seljanda og heimilisfang (gata, borg, land); 

(c) tegund færslukvittunar (greiðsla á sölustað, reiðufjárúttekt, endurgreiðsla); 

(d) kortnúmer maskað þ.e. einungis eru birtir fjórir (4) síðustu tölustafir númersins. Öðrum tölustöfum er skipt út fyrir önnur tákn sem nota skal til fyllingar s.s. “X”, “*” eða “#” ekki skal nota eyður eða tölustafi; 

(e) fjárhæð færslu (eða endurgreiðslu) í úttektarmynt; (f) dagsetningu færslu (eða endurgreiðslu); 

(h) þegar um er að ræða almenna færslu þar sem kort er til staðar, rafræn skráning upplýsinga um korthafa sem lesin eru af segulrönd eða örgjörva; 

(i) vegna örgjörvafærslu, merki kortafélagsins og eftir ákvörðun SaltPay staðfestingargildi færslunnar (í heild sinni) og tengd gögn. 

(j) Þegar lesin er segulrönd þarf að gera ráð fyrir undirskriftarlínu og/eða plássi fyrir undirskrift korthafa á því eintaki færslukvittunar sem ætlað er seljanda, nema þegar slík úttekt er staðfest með PIN eða engrar staðfestingar er krafist; og 

(k) á endurgreiðslukvittunum (á eingöngu við um slíkar kvittanir) þarf að gera ráð fyrir undirskrift seljanda.

11.3. Seljandi heimilar SaltPay að afhenda færslukvittanir, upplýsingar eða önnur gögn eða upplýsingar um færslur til umboðasaðila sinna, kortafélaganna eða annarra þeirra sem nauðsynlegt og eðlilegt er að afhenda svo SaltPay geti uppfyllt skyldur sínar samkvæmt seljandasamningi eða sem aðili að kortafélögunum. 

12.1. Seljandi skal senda til SaltPay, eða aðila sem SaltPay tilgreinir, færslur sem framkvæmdar hafa verið en ekki áður sendar inn í kerfi SaltPay. 

12.2. Seljandi skal senda SaltPay færslur innan þriggja (3) daga frá dagsetningu færslu (degi sem færsla var gerð). Þar af leiðandi skal seljandi senda inn bunka til SaltPay að minnsta kosti á þriggja daga fresti. Seljanda er þó heimilt að senda bunka inn oftar og er ráðlagt að senda bunka daglega. 

12.3. Seljandi má ekki senda færslur í kerfi SaltPay fyrr en að minnsta kosti eitt af eftirfarandi hefur átt sér stað: 

(b) vara eða þjónusta hefur verið send eða afhent. Framangreint skilyrði á þó ekki við þegar um er að ræða fyrirframgreiðslu eða greiðslu að hluta; 

(c) korthafi hefur samþykkt boðgreiðslur.

12.4. Seljanda er óheimilt að senda sömu færslu inn í kerfi SaltPay oftar en einu sinni nema þegar 12.8 á við.

12.5. Seljanda er óheimilt að senda ólögmætar færslur inn í kerfi SaltPay. 

12.6. Hver færsla skal búa yfir þeim upplýsingum sem skylt er að komi fram á færslukvittun, auk MCC kóða seljanda og númeri seljandasamnings nema SaltPay hafi samþykkt með skriflegum hætti að ekki þurfi að senda inn slíkar upplýsingar. 

12.7. Hver færsla þarf að vera á formi sem uppfyllir reglur kortafélaganna. 

12.8. Uppfylli innsending færsluskráar ekki skilyrði kortafélaganna, eða ef færslu fylgja ekki tilskyldar færsluupplýsingar þannig að hægt sé að útbúa fullnægjandi yfirlit fyrir korthafa, skal SaltPay tilkynna seljanda um slíka vankanta um leið og félaginu er um þá kunnugt. Seljanda hefur þá sjö (7) daga frá dagsetningu upprunafærslu til að endursenda færslur inn í kerfi SaltPay. Séu færslur sendar síðar ber seljandi ábyrgð á þeim endurkröfum sem stafa vegna endursendingarinnar. 

12.9. Seljandi skal ávallt fylgja leiðbeiningum SaltPay, í tengslum við móttöku korta. 

13. Endurkröfur og starfsemi umfram viðmiðunarmörk

13.1. Meðhöndlun endurkrafna fer samkvæmt reglum kortafélaganna. Andmælaréttur seljanda er samkvæmt endurkröfureglum viðeigandi kortafélags. 

13.2. Endurkröfur eru á ábyrgð seljanda sem skal endurgreiða SaltPay andvirði allra endurkrafna sem falla á hann sem og endurkröfugjalda ef við á, svo sem gjalds til gerðardóms. Berist endurkrafa í annarri mynt en mynt seljanda er endurkröfufærslan umreiknuð miðað við viðmiðunargengi alþjóðlegu kortasamtakanna á skráningardegi endurkröfunnar

13.3. Sekti kortafélögin SaltPay sökum þess að starfsemi seljanda hefur verið umfram viðmiðunarmörk eða endurgreiðslur seljanda fari yfir 5% af heildarveltu seljanda í mánuði þá skal SaltPay krefja seljanda um andvirði slíkra sekta.

14.1. SaltPay gerir upp við seljanda allar lögmætar færslur sem uppfylla skilyrði seljandasamnings og reglur kortafélaganna. 

14.2. Á uppgjörsdegi greiðir SaltPay seljanda andvirði allra óuppgerðra gildra færslna sem gerðar hafa verið á uppgjörstímabilinu. Þetta á þó ekki við ef til staðar er eitthvað það sem heimilar SaltPay að halda eftir uppgjöri skv. ákvæði 19. gr. 

14.3. SaltPay greiðir uppgjör inn á þann uppgjörsreikning seljanda sem hann tilgreindi í umsókn um seljandasamning. Óski seljandi eftir því að lagt verði inn á annan reikning þarf hann að senda SaltPay undirritað umsóknareyðublað þar sem fram koma upplýsingar um hinn nýja bankareikning. Staðfesting umsóknar um slíka breytingu felur í sér óafturkallanlega heimild SaltPay til að greiða inn á hinn nýja reikning. SaltPay getur neitað að verða við beiðni seljanda um breytingu á bankareikningi ef slíkt er til þess fallið að auka áhættu SaltPay. 

14.4. SaltPay er heimilt að móttaka greiðslur frá kortafélögunum vegna úttekta sem gerðar hafa verið hjá seljanda. Seljanda er ljóst að hann á aldrei kröfu á kortafélögin beint vegna færslna sem sendar hafa verið inn í kerfi SaltPay. 

14.5. Seljandi hefur ekki rétt á að fá greidda uppgjörsfjárhæð, þ.e. andvirði gildra færslna, inn á uppgjörsreikning fyrr en á þeim degi sem þær koma til uppgjörs samkvæmt seljandasamningi við SaltPay. Seljandi á ekki rétt á vaxtagreiðslum af færslum vegna tímabilsins frá innsendingu til uppgjörs og með sama hætti á seljandi ekki rétt á vöxtum af sjóðum sem haldið er eftir í tengslum við viðskiptin.

14.6. Við ákvörðun um beiðni seljanda um uppgjörstíðni aðra en mánaðarlega er litið til niðurstöðu lánshæfis- og áhættumats SaltPay á seljanda. SaltPay er heimilt hvenær sem er á samningstíma, án fyrirvara, að breyta uppgjörstíðni seljanda, á grundvelli aukinnar áhættu eða breytts lánshæfis seljanda. 

14.7. SaltPay útbýr uppgjörsyfirlit sem aðgengilegt er seljanda vegna hvers uppgjörs. Uppgjörsyfirlit tilgreinir fjárhæð sem kemur til greiðslu sem og fjárhæð þóknunar, gjalda og annars sem draga má frá uppgjöri svo sem leiðréttar færslur og fleira. 

14.8. Samþykki og/eða uppgjör færslna og/eða tilgreining þeirra í uppgjörsskjölum eða öðrum tilkynningum SaltPay til seljanda skal ekki á nokkurn hátt teljast staðfesting þess að SaltPay telji færslur gildar. SaltPay áskilur sér rétt til að hafna færslu á síðari stigum gerist eitthvað sem bendir til eða berist félaginu upplýsingar um að færslur hafi verið ólögmætar. 

14.9. Komi til þess að samanlögð fjárhæð endurgreiðslna, endurkrafna, þóknana eða annarra krafna SaltPay á seljanda er hærri en sem nemur uppsafnaðri veltu seljanda á sama tíma, þannig að á samningi myndist skuld gagnvart SaltPay skal seljandi greiða SaltPay slíka skuld á gjalddaga. Gjalddagi er 7 dögum frá dagsetningu skuldar (neikvæðrar stöðu). Ef gjalddagi lendir á almennum frídegi eða helgidegi færist hann á næsta virka dag. 

14.10. Seljandi hefur ekki rétt á að fá greidda uppgjörsfjárhæð, þ.e. andvirði gildra færslna, inn á uppgjörsreikning fyrr en greiðsla vegna þeirra hefur borist til SaltPay frá kortafélögunum og/eða viðeigandi útgefendum. Seljandi á ekki rétt á vaxtagreiðslum af færslum vegna tímabilsins frá innsendingu til uppgjörs og með sama hætti á seljandi ekki rétt á vöxtum af sjóðum sem haldið er eftir í tengslum við viðskiptin. 

15.1. Frá dagsetningu neikvæðrar stöðu seljanda, og fram að greiðsludegi skuldbindur seljandi sig til að greiða vexti af slíkri skuld. Frá gjalddaga, sbr. ákvæði 14.9, fram að greiðsludegi reiknast dráttarvextir samkvæmt 5. gr. laga nr. 38/2001 um vexti og verðtryggingu. 

15.2. Vextir af skuld fara samkvæmt verðskrá SaltPay hverju sinni. SaltPay skal heimilt að breyta vöxtum, sbr. nánar ákvæði 29.1. 

15.3. Við útreikning er miðað við 30 vaxtadaga í mánuði og 360 vaxtadaga í ári. Vextir reiknast af neikvæðri stöðu við lok hvers dags og færast til skuldar á samningi seljanda. Vextir reiknast ekki á þeim degi sem neikvæð staða er leiðrétt. Allar innborganir á skuld seljanda ganga fyrst til greiðslu vaxta og kostnaðar, þ.m.t. innheimtugjalda og lögmannsþóknunar þar sem við á. 

16.1. Til þess að skera úr um allan vafa þá ber SaltPay engin skylda til að greiða seljanda andvirði ólögmætrar færslu og seljandi hefur engan rétt til að krefja SaltPay um greiðslu andvirðis slíkrar færslu. 

16.2. Hafi SaltPay greitt seljanda andvirði færslu sem síðar kemur í ljós að hafi verið ólögmæt eða fyrir því er rökstuddur grunur er SaltPay heimilt að endurkrefja seljanda um andvirði færslunnar auk þess sem SaltPay er án nokkurra takmarkana heimilt að skuldajafna andvirði hennar frá heildarfjárhæð uppgjörs/(a) seljanda. 

16.3. Þrátt fyrir það sem fram kemur hér að ofan þá skal seljandi greiða SaltPay öll gjöld, þóknanir og kostnað af ólögmætri færslu eins og þau eru tilgreind í seljandasamningi. 

16.4. Til þess að skera úr um allan vafa þá eiga greinar 15.1-15.3 við óháð því hvort SaltPay er skylt eða mögulegt að endurgreiða kortafélögum, kortaútgefanda eða korthafa hina ólögmætu færslu. 

17.1. SaltPay áskilur sér rétt til að skilgreina lágmarksfjárhæð uppgjörs. Sé uppgjör að fjárhæð jafnt eða lægra en skilgreind lágmarksfjárhæð þá frestast greiðsla þess til næsta uppgjörs. 

17.2. Ef andvirði uppgjörs gildra færslna sem komið er á gjalddaga á uppgjörsdegi er lægra en lágmarksfjárhæð uppgjörsins, verður uppgjöri þeirra færslna seinkað til næsta áætlaða uppgjörsdags þar sem uppgjörsfjárhæð gildra færslna er jafnt eða hærra en lágmarksfjárhæð uppgjörs. 